Creative Armenia-ն ուրախ է ներկայացնելու 12 ստեղծարար բիզնեսների, որոնք սկսել են իրենց աքսելերացիոն ճանապարհորդությունը: Artbox Accelerator ծրագիրը եզակի հնարավորություն է ընձեռում այս ընկերություններին արդյունավետորեն զարգացնելու իրենց բիզնեսները և մեծ դեր խաղալու ստեղծարար տնտեսության մեջ:

2023 թվականի հոկտեմբերից դեկտեմբեր ընկած ժամանակահատվածում՝ 8 շաբաթվա ընթացքում, ընտրված թիմերը կունենան շաբաթական աշխատարաններ, նպատակային առաջադրանքներ և անհատական խորհրդատվություններ, որոնք նախատեսված են նրանց աճը խթանելու համար։ Մենթորների շարքում են փորձագետներ և հաջողակ ձեռներեցներ Հայաստանից և նրա սահմաններից դուրս, այդ թվում՝ Էստոնիայից, Դանիայից, Ֆրանսիայից, Շվեյցարիայից և Եգիպտոսից։

Artbox Accelerator-ը կուղղորդի ստեղծարար բիզնեսներին մեծացնելու իրենց հաճախորդների ներգրավվածությունը, խթանելու վաճառքը, կայունություն ձեռք բերելու և ավելին։ Ծրագիրը կեզրափակվի իրենց լավագույնս դրսևորած 7 բիզնեսների ընտրմամբ, որոնց կտրամադրվեն մինչև 30,000 եվրոյի չափով դրամաշնորհներ՝ Artbox -ի ընթացքում իրենց կողմից մշակված բիզնեսի աճի ծրագիրն իրականացնելու նպատակով։

Artbox Accelerator-ին մասնակցող 12 ստեղծարար բիզնեսներն են՝
 

• Արտույտ (Նորաձևության ապրանքանիշ)
  Նրբագեղ շարֆերի արտադրություն, որոնք բացահայտում են հայկական մշակույթը՝ հասցնելով այն համաշխարհային մակարդակի։
• Բերբերյան Փրոդաքշն Ստուդիոս (Երաժշտական արտադրություն)
  Ստուդիա, որը կինոերաժշտության ստեղծման և ձայնի հետարտադրության առաջատարներից է Հայաստանում և արտասահմանում:
• ԳԱԼԻՔ Ժառանգության Տուն (Արվեստի կենտրոն)
  Մշակութային կենտրոն Գյումրիում, որն առաջարկում է հոգևոր և դյութիչ փորձառություն՝ խորասուզվելով դեպի հայկական հարուստ ժառանգության խորքեր:
• Հովաշ (Նորաձևության ապրանքանիշ)
  Զարդերի նուրբ և ձեռագործ արտադրություն, որն ընդգծում է բնության գեղեցկությունն ու անհատական արտահայտչականությունը:
• Կելվին Ֆիլմ Լաբ (Կինոարտադրություն)
  Տեսանյութերի արտադրության ստուդիա, որը տրամադրում է մեդիա գաղափարներ և ռեսուրսներ՝ ստեղծելու որակյալ արտադրանք:
• NENSI AVETISIAN (Նորաձևության ապրանքանիշ)
  Հագուստի և աքսեսուարների ապրանքանիշ, որն իր մեջ միավորում է հայկական արհեստավարժությունը, փառահեղ և ոգեշունչ ճարտարապետությունը և բնական հումքի օգտագործումը:
• Օբերտոն (Երաժշտական արտադրություն)
  Երաժշտական ընկերություն, որը համատեղում է ամբողջական աուդիո արտադրության և աուդիո բրենդինգի ծառայությունները՝ սկզբից մինչև վերջ երաժշտական ղեկավարում, առաջխաղացում և արվեստագետների զարգացում:
• ՕնՕֆֆ ստուդիա (Անիմացիոն ստուդիա)
  Ստուդիա, որի առաքելությունն է ստեղծել գրավիչ անիմացիոն պրոդուկտներ, որոնք կտարբերվեն համաշխարհային շուկայում:
• Թատրոն տանիքում (Արվեստի կենտրոն)
  Այլընտրանքային թատրոն, որը մեկ յուրահատուկ ձևաչափի մեջ միավորում է թատերական ներկայացումներ, կենդանի համերգային ծրագիր և գինու հյուրասիրություն:
• Թոնիր հարսանեկան գյուղ (Մշակութային միջոցառումներ)
  Մշակութային բիզնես, որը վերածնում և տոնում է ավանդական ծեսերը, խաղերը, խոհանոցը և արհեստագործությունը՝ կազմակերպելով իսկական էթնիկ հարսանիքներ:
• Վառեմ-մարեմ արվեստանոց (Արվեստի կենտրոն)
  Ստեղծարար արվեստանոց Գյումրիում, որը ոգեշնչում և խրախուսում է այցելուներին բացահայտել արվեստը՝ ստեղծելով խեցեղեն, քանդակներ և ձեռագործ իրեր:
• Z.G.EST (Նորաձևության ապրանքանիշ)
  Հագուստի կայուն բիզնես, որը ստեղծում է եզակի, ժամանակ չճանաչող  և ֆունկցիոնալ ոճեր 100% բնական և կենսաքայքայվող գործվածքներից:

«Creative Armenia-ում ստեղծարար բիզնեսի առևտրային կենսունակության և կայունության ամրապնդումը մեր հիմնական նպատակներից է։ Այս նպատակն առավել արդյունավետ է իրականացվում Artbox Accelerator-ի միջոցով։ Աջակցելով 12 առաջատար ստեղծարար բիզնեսների՝ երաժշտական արդյունաբերությունից մինչև անիմացիա, նորաձևություն և ոչ միայն՝ մենք մեր ազդեցությունն ենք ունենում Հայաստանի ստեղծագործական արտադրության էկոհամակարգի վրա որպես մեկ ամբողջություն», – ասաց Creative Armenia-ի ծրագրերի տնօրեն Անուշ Տեր-Խաչատրյանը։

«Կատապուլտ ծրագրում մենք ընդգծում ենք գոյություն ունեցող մշակութային կազմակերպությունների և համագործակցելու իրենց ներուժի կարևորությունը։ Artbox Accelerator-ը եզակի հնարավորություն է ընձեռում նշված կայացած մշակութային կազմակերպությունների համար ներգրավվելու տեղական և միջազգային մշակութային շահագրգիռ կողմերի հետ, ցուցադրելու նրանց աշխատանքը նոր լսարաններին և ամրապնդելու իրենց ստեղծագործական գաղափարները՝ դրանով իսկ հզորացնելով իրենց կապերը համայնքի հետ և ընդլայնելով իրենց իրական ազդեցության շրջանակը հասարակության մեջ», - ասաց «Կատապուլտ» ստեղծարար աքսելերացիոն ծրագրի ղեկավար Աննա Գարգարյանը։