Ծանոթացեք ToneLab-ի՝ Արմեն Եդիգարյանի, Նարեկ Թովմասյանի, Արսեն Օհանջանյանի ստեղծարար երաժշտական ​​բիզնեսի հետ: ToneLab-ը Artbox Incubator ծրագրին մասնակցած այն նախագծերից է, որը ստացել է Artbox-ի սաղմանային դրամաշնորհը՝ ծրագրի հաջող ավարտին ներկայացնելով տպավորիչ բիզնես պլանի փաթեթ: ToneLab-ը բազմաֆունկցիոնալ և հավակնոտ նախագիծ է. տարածք, որը իր շուրջ հավաքում է տարբեր մակարդակների և փորձառության երաժիշտների՝ նրանց առաջարկելով հարթակ մասնագիտական ​​գործունեության, ձայնագրման, ինչպես նաև սովորելու համար: Ստուդիան պաշտոնապես բացեց իր դռները 2023 թվականին՝ Artbox Incubator ծրագրի ավարտից անմիջապես հետո։ Այդ ժամանակվանից ի վեր թիմը հասցրել է կազմակերպել մի շարք կենդանի հնչողությամբ համերգներ տարբեր հայ երաժիշտների և խմբերի հետ: Կարդացեք՝ ավելին իմանալու ToneLab թիմի և նրանց ստուդիայի տեսլականի մասին:

ToneLab-ը միաժամանակ և՛ երաժշտական խումբ է, և՛ դպրոց, և՛ ձայնագրման լեյբլ։ Ի՞նչ կարիքներ էիք նկատել շուկայում և ի՞նչ բացեր, որոնք ուզում էիք լցնել, երբ սկսեցիք ձեր բազմապրոֆիլ ստեղծարար բիզնես նախագիծը։ 

Մասնավորապես ռոք և ալտերնատիվ երաժշտական արտադրության ոլորտում կա գիտելիքի, մարդկային և տեխնիկական ռեսուրսների պակաս: Ոլորտում մանկավարժական և կատարողական 10 տարուց ավել կուտակած փորձը մեզ հանգեցրեց այն մտքին, որ պետք է համակարգել դասընթացները և պարապմունքները` ուսուցանվող գործիքների և երաժշտության խորքային ճանաչողության համար, առաջարկել նոր միջավայր, որը կնպաստի անհոգ ստեղծագործական ընթացքին խմբային փորձերի ժամանակ և կազմակերպել այդ ամենը մեկ հարկի տակ` ապահովելու բարձրակարգ որակ և արժանի վերաբերմունք ստեղծագործ մարդկանց և երաժշտության սիրահարներին:
 

Ինչպե՞ս է տրվում աշխատանքը հայկական երաժշտական ասպարեզի համատեքստում։ Ի՞նչ մարտահրավերներ կամ հնարավորություններ են սովորաբար ի հայտ գալիս ձեր բիզնեսի նման նախաձեռնությունների համար։ 
 

Ցանկացած նորություն ժամանակ է պահանջում իր լսարանի ընկալման մեջ հաստատվելու համար:  Ամենամեծ մարտահրավերը նոր որակային մակարդակ հիմնելն է, ինչն էլ մենք անում ենք պատասխանատու կերպով և հետամուտ ենք լինում ոլորտի զարգացմանը նպաստող ամեն քայլի իրագործմանը:

Կկիսվե՞ք ToneLab-ի վերաբերյալ ձեր նպատակներով և նախագծերով մեզ հետ։ Ի՞նչ տեսլական ունեք բիզնեսի աճի համար գալիք տարիների ընթացքում։
 

Թոնլաբը շատ արագ տեմպերով աճող օրգանիզմ է. օրեցօր մեր թիմը համալրվում է նոր մասնագետներով, ավելի շատ մարդիկ են օգտվում մեր ծառայություններից և շուտով արդեն կարիք է լինելու նոր, ավելի մեծ հաստատության, որում Թոնլաբի ամեն ճյուղ կունենա իր կենտրոնը` նորից մեկ հարկի տակ: Ոլորտում առաջընթացի տեսանկյունից մենք աշխատում ենք, որ գալիք տարիների ընթացքում  կարողանանք մեր արտիստներին ներկայացնել զարգացած երկրներում և ստեղծենք համապատասխան ձևաչափ մեզ մոտ միջազգային փառատոնային արտիստներ հյուրընկալելու:
 

Որպես Artbox ինկուբատոր ծրագրի մասնակիցներ, բիզնեսի հետ կապված ի՞նչ խորհուրդ է ձեզ ամենաշատը հիշվել ծրագրի ընթացքում, որով դուք կուզեիք կիսվել ապագա ստեղծարար ձեռներեցների հետ։
 

Ցանկացած գաղափար հնարավորինս պարզ ներկայացնելու հետ կապված մի խորհուրդ եղավ, փորձելու միտքը արտահայտել ծեր տատիկին կամ 3րդ դասարանի աշակերտին :) Խորհուրդն գնում է հնարավորինս ֆիլտրել միտքը և թողնել ամենաէականը ձեր գաղափարի մեջ:
 

Լուսանկարները՝ Dezerlis-ի