Creative Armenia-ն ուրախ է պաշտոնապես մեկնարկել Artbox Accelerator ծրագրի երկրորդ թողարկումը և հայտերի ընդունումը, որը նախատեսված է բիզնեսների զարգացումը խթանելու համար։

Artbox Accelerator-ը 8-շաբաթյա առցանց ծրագիր է՝ ստեղծված Հայաստանում բոլոր ստեղծարար ոլորտներում գործող բիզնեսների համար, որը նրանց աննախադեպ հնարավորություն է ընձեռում՝ զարգացնելու և խթանելու իրենց բիզնեսը, ընդլայնելու իրենց լսարանը և դառնալու ավելի շահութաբեր։ Աշխատելով տեղացի և միջազգային առաջատար մենթորների և առաջնորդների հետ՝ մասնակից կազմակերպությունները կմշակեն զարգանալու և հզորանալու ռազմավարություն՝ ընդլայնելու իրենց ծառայությունները, լսարանը, օպտիմալացնելու մարքեթինգային ռազմավարությունը և ոչ միայն։ Ծրագրի ավարտին մասնակիցները կներկայացնեն իրենց բիզնեսները խթանելու նախագծերը, և ընտրված լավագույններից յուրաքանչյուրը կստանա մինչև 30,000 եվրոյի չափով դրամաշնորհ՝ իրենց ծրագիրը կյանքի կոչելու համար:

Ծրագրին ծանոթանալու և մինչև ծրագրի վերջնաժամկետը՝ 2024թ.-ի մայիսի 5-ը, դիմելու համար կարող եք այցելել artbox.am/hy/accelerator

«Ստեղծարար սկսնակ ընկերություններին իրենց զարգացման մեջ ուղղորդելն ու աջակցելը Artbox Accelerator ծրագրի հիմնական նպատակն է, որը ծառայում է Artbox-ի գլխավոր առաքելությանը` արվեստն առևտրային առումով ավելի հաջողակ և կայուն դարձնելու համար: Մենք ուրախ ենք ողջունելու ստեղծարար բիզնեսների մեր երկրորդ խմբին», –  ասաց Creative Armenia-ի ծրագրերի տնօրեն Անուշ Տեր-Խաչատրյանը։

Հայտերը բաց են այն ստեղծարար բիզնեսների համար, որոնք իրենց գործունեությունը ծավալում են Հայաստանի Հանրապետության սահմաններում և ցանկանում են առավելագույնի հասցնել իրենց եկամուտները, ընդլայնել իրենց լսարանը և բարձրացնել բրենդի ճանաչելիությունը։ Ծրագիրը նախատեսված է ստեղծարար ոլորտներում գործող այն կազմակերպությունների համար, որոնք առաջ են մղում իրենց ստեղծագործական սահմանները և պատրաստ են ուսումնասիրել առևտրային հնարավորություններն ու ավելացնել իրենց շահույթները։