Creative Armenia-ն նշում է Artbox Incubator ծրագրի երկրորդ թողարկման հաջող ավարտը, որի նպատակն է աջակցել առևտրային հաջողության ներուժ ունեցող ստեղծարար գաղափարներին:

Ընտրված 20 անհատներ և թիմեր, որոնք ներկայացնում են առաջադեմ նախագծեր վիզուալ արվեստի, դիզայնի և այլ ոլորտներից, աշխատել են բարձրակարգ մենթորների և հայտնի մշակութային առաջնորդների հետ Հայաստանից, Նիդեռլանդներից, Դանիայից, Մալթայից և Էստոնիայից՝ կյանքի կոչելու իրենց նախագծերը: Շաբաթական աշխատարանների միջոցով մասնակիցները մշակել են իրենց նախագծերը՝ անդրադառնալով բոլոր ասպեկտներին՝ ներառյալ շուկայական վերլուծությանը, բիզնեսի ռազմավարությանը, փիչինգին և այլ թեմաներին: Ծրագրի ավարտից հետո 20 նախագծերից 10-ը ստացավ ընդհանուր 100,000 եվրո դրամաշնորհ՝ աջակցելու նրանց դառնալ կենսունակ բիզնեսներ:

Ընդհանուր 100,000 եվրոյի չափով (յուրաքանչյուրը 10,000 եվրո) դրամաշնորհ ստացած 10 նախագծերն են՝

• ArtInsight
  Արվեստագետներին և արվեստասերներին միավորող առցանց հարթակ, որը համադրում է ժամանակակից արվեստի գործերի տարբեր հավաքածուներ՝ նպաստելով մշակութային փոխանակմանն ու ստեղծարարությանը։
   
• Crop Up
  Փոդքասթ ստուդիա և թվային հարթակ, որը ծառայում է որպես միասնական տարածք ստեղծագործողների համար՝ թողարկելու և տարածելու տարբեր փոդքասթ նախագծեր՝ առաջնայնություն տալով հայկական փոդքասթների տարածմանը:
   
• Daobab
  Շքեղ աքսեսուարների արտադրություն և վաճառք, որոնք նպատակ ունեն զարգացնել զարդեր ստեղծելու արհեստը՝ օգտագործելով ոսկի, արծաթ և բնական կաշի:
   
• DrumStar Corporation
  Կոմպակտ, բազմահարկ էլեկտրոնային հարվածային գործիքների նորարարություն, որը նախատեսված է ավելի դյուրին դարձնելու հարվածային գործիքների ուսուցման, կատարման և ձայնագրման գործընթացը։
   
• Fotokombinat N17
  Այլընտրանքային լուսանկարչական ստուդիա, որը վերակենդանացնում է պատմական լուսանկարչության արվեստը Հայաստանում՝ առաջարկելով իրապես եզակի և խորը փորձառություն:
   
• Hay ink 
  Հայկական արվեստ՝ ներկայացված հագուստի նորաձևության մեջ և ցուցադրված առցանց շուկայում՝ բարձրացնելու արվեստագետների տեսանելիությունը և կապ ստեղծելու համաշխարհային լսարանի հետ:
   
• IMAGERY №3
  Բազմոլորտային ստեղծարար նորաձևության և ոճավորման տարածք, որն ապահովում է յուրօրինակ 360° մոտեցում նորաձևության պատմությանը, փորձին և ոճի զարգացմանը:
   
• Line: Armenian Architecture Biennial
  Շրջիկ ճարտարապետական բիենալե, որը ճամփորդում է Հայաստանի հանրային տարածքներով, անդրադառնում համայնքային մարտահրավերներին և տարածում վերափոխման գաղափարը՝ այս ամենը դիզայնի տեսանկյունից:
   
• SHRJAN 
  SHRJAN-ն օգնում է երեխաներին կապ հաստատել իրենց հայկական ժառանգության հետ թվային հարթակի միջոցով, որը տրամադրում է ինտերակտիվ ստեղծագործական հավաքածուներ։
   
• Studio Kerani
  Խեցեգործական ստուդիա, որը շեշտը դնում է արդիականացված հայկական զարդանախշերի կիրառմամբ բարձրակարգ կերամիկական իրերի արտադրության վրա՝ նպատակ ունենալով հանրահռչակել և պահպանել մշակութային ժառանգությունը:

«Artbox-ի միջոցով մենք հզորացնում ենք արվեստագետների և ստեղծագործողների հաջորդ սերունդը՝ զինելով նրանց հիմնարար բիզնես մտածելակերպով և հմտություններով և միջոցներ տրամադրելով՝ իրենց ստեղծարար գաղափարները զարգացնելու ու վերածելու առևտրային առումով կենսունակ ստեղծագործական արտադրանքի: Մենք շատ ուրախ ենք շարունակելու այս աջակցությունը՝ սաղմնային դրամաշնորհ տրամադրելով 20 ինկուբացված նախագծերից 10 ստեղծարար նախագծերի, որոնք ունեն առևտրային ներուժ»,- ասաց Creative Armenia-ի ծրագրերի տնօրեն Անուշ Տեր-Խաչատրյանը։