Creative Armenia-ն ուրախ է հայտարարել իր հեղինակային Artbox Entrepreneur ծրագրի երրորդ թողարկման և հայտերի ընդունման պաշտոնական մեկնարկի մասին, որը նախատեսված է աջակցելու անհատ արվեստագետներին դառնալ ստեղծարար ձեռներեցներ։ 2024 թվականի ուշ աշնանը 6-շաբաթյա օնլայն աքսելերացիոն ծրագիրը հնարավորություն կտա արվեստի տարբեր բնագավառներից մինչև 24 ընտրված անհատ ստեղծագործողների կատարելագործելու իրենց ստեղծագործական կարիերան, զարգացնելու իրենց անհատական բրենդինգը և ապահովելու ավելի մեծ եկամուտ։ Մասնակիցները կհամագործակցեն բիզնես ոլորտում աշխարհի առաջատար մենթորների և մշակութային առաջնորդների հետ՝ զարգացնելու անհատական կարիերայի խթանման նախագիծը իրենց ստեղծարար բիզնեսների համար, և կստանան 2,500 եվրոյի չափով դրամաշնորհ՝ իրենց նպատակների իրականացման համար:

Artbox Entrepreneur ծրագրին ծանոթանալու և դիմելու համար կարող եք անցնել այս հղմամբ՝ artbox.am/hy/entrepreneur։ Հայտերի ընդունման վերջնաժամկետը 2024 թվականի հոկտեմբերի 1-ն է։

«Artbox Entrepreneur ծրագիրն արդեն ապացուցել է իր արդյունավետությունը և համարվում է ստեղծագործողների կարիերայի արդյունավետ սկիզբ՝ որպես ստեղծարար ձեռներեցներ։ Մենք անհամբեր սպասում ենք աջակցելու տաղանդավոր ստեղծագործողների նոր հոսքին աշնանը», – ասաց Creative Armenia-ի ծրագրերի տնօրեն Անուշ Տեր-Խաչատրյանը։

Ծրագիրը բաց է այն անհատ ստեղծագործողներ համար, որոնք ծավալում են իրենց ստեղծագործական և մասնագիտական գործունեությունը Հայաստանի Հանրապետությունում և ցանկանում են իրենց տաղանդը կատարելագործել, վերածել վաճառելի արտադրանքի և շուկա հանել: Ծրագիրը նպատակ ունի աջակցելու տարբեր ոլորտների անհատ արվեստագետների՝ հաշվի առնելով իրենց փորձառությունը ստեղծարար արդյունաբերության մեջ, տպավորիչ պորտֆոլիոն և իրենց համապատասխան արվեստի բնագավառում ստեղծագործական գործունեության պատմությունը։